ڕۆمانی كورسی سەرۆكایەتی یەكێكە لەو ڕۆمانانەی باس لە سیاسەت دەكات، بەڵام لە میانەی خەیاڵ و واقیع. واتە نووسەری ڕۆمانەكە بە تەواوی كەوتووەتە ژێر كاریگەری ئەو وتە بەناوبانگەی كە دەڵێ: (راستییەكی زۆر دەوڵەمەند هەیە كە هونەر بەرهەمیدەهێنێت، ئەویش تێكەڵكردنی مێژووە بە خەیاڵ). وەك ئاشكرایە خەیاڵ ئەو پەناگا گەورەو فراوانەیە كە ئەدیب پەنای بۆ دەبات و لە ڕێگەیەوە كار بۆ دارشتنەوەی حەقیقەتە مێژوییەكان دەكات. بە مانایەكی تر هیچ ئەدیبێك نایەت مێژوو وەك خۆی بگێڕێتەوە، بەڵكو لەگەڵ خەیاڵدا موتوربەی دەكات و هەردوكیان لە بۆتەقەیەكی سەرنجڕاكێشدا تێكەڵ بەیەك دەكات.
نووسەری مەكسیكی كارلۆس فوینتس كە كەسێكی چەپخوازە و ماوەیەك دیبلۆماسی وڵاتەكەی بووەو نزیك بووە لە ڤیدڵ كاسترۆوە، لە نێوان ساڵانی 1974 بۆ 1977 باڵوێزی وڵاتەكەی بووە لە فەرەنسا. لەم رۆمانەیدا قسەی خۆی لەسەر سیاسەت و چۆنیەتی گەیشتن بە كورسی دەسەڵات دەكات. نووسەر باس لە رابردوو ناكات، باس لەو سەرۆكانە ناكات كە لە كۆندا حوكمی مەكسیكیان كردووە، بەڵكو باس لەوە دەكات سیاسەت لە ساڵی 2020 لە هەندێ لە وڵاتانی ئەمریكای لاتین چی لێ دێت و چۆن دەگوزەرێت. ئەم باسكردنەشی لەڕێگەی نووسینی نامەوە ئەنجامداوە.
تەواوی رۆمانەكە بریتییە لە 70 نامە كە كارەكتەرە جیاواز جیاوازەكانی نێو رۆمانەكە بۆ یەكتریان نووسیوە. ئەم حاڵەتە، واتە رۆمانێك لە ژمارەیەكی زۆر نامە پێكهاتبێ، ئاسان نییە و پێویستی بە خەیاڵێكی فراوان و سەلیقەیەكی گەورەی بیركردنەوە هەیە. بۆچی؟ چونكە نووسینی نامە كارێكی هەر وا ئاسان نییەو پێویستی بە زمانێكی ئەدەبی ناسك و پاراو هەیە. ئاسان نییە لە ڕێگەی نامەوەو نامەكەش بە زمانێكی ئەدەبی جوان نووسرابێت، بێیت قسە لەسەر سیاسەت بكەیت. ئەمە ئەگەر ئەوە لەبەرچاو بگرین كە سیاسەت بۆ خۆی خاڵییە لە ناسكی و پڕە لە ململانێ و تۆمەتبەخشین و فڕوفێڵ.
ڕۆمانەكە بە كۆنگرەیەكی ئەنجومەنی ئاسایش دەستپێدەكات، لەوێدا سەرۆك كۆماری مەكسیك، دژ بە داگیركردنی ئەمریكا بۆ كۆلۆمبیا و دژ بە سیاسەتی نەوتی ئەمریكا، دەنگ دەدات. لێرەوە ئەمریكا زۆر بەخێرایی تۆڵەی خۆی بەرامبەر بە مەكسیك رادەگەیەنێت، بەوەی سەرۆك كۆماری ئەمریكا بڕیاردەدا، لە ڕێگەی مانگە دەستكردەكانییەوە، هەمو هێڵەكانی پەیوەندی ناو مەكسیك بپچڕێنێت. بەم شێوەیە هیچ هۆكارێكی پەیوەندی لە جۆری تەلەفۆن و فاكس و بەریدی ئەلیكترۆنی بوونیان نامێنێت، بەم جۆرە وڵات دووچاری بەڵایەكی گەورەی ئیداری و كارگێڕی دەبێت، بۆیە تاقە هۆكارێك كە بۆ پەیوەندی كردن بە یەكترییەوە مابێتەوە نووسینی نامەیە. ئا لێرەوەو لە میانەی ئەو نامانەی كە دەنووسرێن، بەخێرایی ململانێ لەنێوان ئەو كەسانەدا دەردەكەوێت كە دەیانەوێ لە مەكسیك بگەنە كورسی سەرۆكایەتی. دوای نەمانی هۆكارەكانی پەیوەنیكردن، كاغەز رۆڵێكی گرنگ دەگێڕێت و شوێنی شیاوی خۆی وەردەگرێتەوە كە پێش شۆڕشی تەكنەلۆژیا هەیبووە. ئەمەش دیوێكی دیكەی رۆمانەكەیە.
دەكرێ بڵێین نووسەر بۆ ئەوەی بیانوویەك بۆ رۆمانەكەی بدۆزێتەوە كە بۆچی تەواوی ئەم رۆمانەی لەسەر شێوەی نامە نووسیوە؟ هاتوە روداوێكی دروست كردووە، روداوێك وا دەكات قەناعەت بە خوێنەر بكات كە هۆكاری نووسینی ئەو هەمو نامەیە، ئەو رووداوەیە: نەمانی هۆیەكانی پەیوەندیكردن. لە راستیدا ئەم خەیاڵە فانتازیایە، لایەنێكی جوانی رۆمانەكە و توانای نووسەر بۆ دروستكردنی فەنتازیا دەردەخات. نوسینی رۆمانێك بە كۆمەڵێ نامەی جیاواز جیاواز، پێویست بەوە دەكات خاوەنەكەی توانای ئەوەی هەبێت بەقەد ژمارەی نامەكان، دەنگ و ڕەنگی جیاوازی هەبێت. چونكە هەر كارەكتەرەی بە جۆرێك و بە شێوازێك نامەكانی دەنوسێ كە تەواو جیاوازە لە نووسینی كارەكتەرەكانی دیكە. بۆیە نووسەر دەبێت زۆر باش ئاگاداری ئەو گەمەیە بێت كە دەیكات، چونكە هەمو بێ ئاگاییەك ڕۆمانەكە بە دیوێكی دیكەدا دەبات كە خوێنەر دووچاری بێزاربوون و ناڕەحەتی دەكات. خۆشبەختانە خوێنەر لەم رۆمانەدا هەست بەو بێزاری و ناڕەحەتییە ناكات.
نووسەری رۆمانەكە، لە میانەی ئاڵوگۆڕی نامەكانەوە، جیهانێكی سەیرو سەرنجڕاكێشمان بۆ دەردەخات، جیهانێك پڕە لە ساختەكاری و پیلانگێڕی و دەعوەت و دەعوەتكاری و بوغز و رق و كینە. لەو جیهانەدا ئاشنا دەبین بە نهێنییە زۆر تایبەتەكانی وەزیرەكان، جیهانی ئەو ئافرەتانە دەناسین كە بە رۆژ فەرمانبەری حكومەت و بەشەوان لە تیاترۆكاندا كاری لەشفرۆشی دەكەن و لێزانانە پیاوەكان، ئەوانەی پلە و پۆستی سیاسی گەورەو گرنگیان هەیە، دەخەنە تەڵەی خۆیانەوە، ئەمەش بۆ ئەوەی خەونە تایبەتەكانی خۆیان لە بواری سیاسەتدا، واتە گەیشتن بە كورسی سەرۆكایەتی، بەدیبێنن.
نامەكان چی بە خوێنەر دەڵێن؟ نامەكان ئەو دەسیسە و پیلانە نهێنیانە دەگێڕنەوە كە لە نێوان كۆمەڵێ كەسی ركابەر بەیەك، هەوڵدەدەن بگەنە كورسی سەرۆكایەتی، بۆچی؟ چونكە هەر هەمویان دەیانەوێ جێگەی سەرۆك كۆمار بگرنەوە كە دووچاری نەخۆشی شێرپەنجە بووەو ناتوانێت بۆ جارێكی دی خۆی كاندید بكاتەوە.
ئەم رۆمانە لەلایەن كاك هەڵكەوت عەبدوڵڵاوە كراوە بە كوردی و مامۆستا شێرزاد حەسەن پێداچوونەوەی بۆ كردووە. ژمارەی لاپەڕەكانی 512 لاپەڕەی قەبارە بچوكە، تیراژەكەی هەزار دانەیە و نرخی دە هەزار دینارە.
