بە بۆنەی یەکەمین ساڵیادی کۆچی دوایی (کاکەمەم بۆتانی)یەوە

لە یەکێتیی نووسەران و چیرۆکەوە بۆ ڕۆمان و یادداشتنووسین

 

 ئازاد عەبدولواحید*

 

 

پار لە ڕۆژێكی وەك ئەمڕۆ، ڕێکەوتی ٢٥/١٠/٢٠٢٠، دەکاتە ساڵێك بەسەر ژیانئاوایی چیرۆكنووس و ڕۆماننووس، سەرۆكی یەكێتیی نووسەرانی كورد (كاكەمەم بۆتانی)دا تێدەپەڕێ، كە لە شاری هەولێر بەهۆی ڤایرۆسی نەگریسی كۆرۆناوە كۆچی دوایی كرد، بە داخەوە ئەوە ماوەیەکە ئەو ڤایرۆسە زۆر بێ بەزەییانە دەستی لە ئەوکی ئازیزانمان گیرکردووە و کەوتووەتە دروێنەکردنی گیانی هاوەڵانمان و چەندان کەسی جوان و گرنگی لێ ڕفاندووین.

 

* سەرەتاكان

كاكەمەم فەخری سامی بۆتانی، بەهۆی وەزیفەی باوكییەوە كە مامۆستا بووە، هەر ڕۆژەی لە شار و شارۆچكەیەك گیرساوەتەوە و ژیاوە، لە ژینگەی كوردەواری كۆیەوە بەرەو دنیایەكی جیاواز لە (هیندی)یەی باشووری عێراق و سروشتی عەرەبستان و ناكۆكی نێوان شیعە و سوننە، دواتر ناحیەی پردێ و زێی بچووك و ژیانی كۆمەڵایەتی و نەتەوەیی و بوونی دوو زمانی كوردی و توركمانی، پاشان هەولێری قەڵا و منارە و مێژوو و ئاوەدانیی شار و قەیسەری و بازاڕ و شەمەندەفەر، كۆیە و خزمانی دایكی و باواجی و هەیبە سوڵتان و حەمامۆك و گەڕەكی قەڵا و دیانان و جوولەكان، دواجار لە گوندی (هەرتەل)ی دوور لە شارستانیەت، بەڵام پڕ لە جوانیی سروشتی گیرساوەتەوە، كە لە تەك سیاسەتدا ئەو شوێنانە و نیشتەجێ بوون لێیان، جێپەنجەی خۆیان لە هزر و هەستیدا نەخشاندووە و چەكەرەی ئەدەبیاتیان لە كەسایەتیی (كاكەمەم بۆتانی)دا دروست كردووە، بۆیە ئەو كەسێكی قاڵبووی ژیانی كۆمەڵایەتیی و سیاسی بووە، كە لاپەڕەكانی ژیانی هەڵدەدەیتەوە، هەر لەو ڕۆژەوەی باوكی بۆ گوندێکی لای ڕانیە بە ناوی (هەرتەل) دوور دەخرێتەوە، کاتێ لەوێ كۆچی دوایی دەكات و لەسەر پشتی هێسترێك دەیبەنەوە، لەو كاتەشدا (ئافتاو)ی خوشكی کە منداڵ بووە لە باوەشی دایكی دەكەوێ و دواتر دەمرێ، لەو ڕۆژەوە ژیانی دەردەسەری و نەبوونی و دەستکورتی دەست پێ دەكات، ئیدی لەو ڕۆژەوە لە سۆز و باوەشی گەرمی باوكایەتی دوور دەكەوێتەوە و لە ماڵە خاڵوانی دەژی، دوای بڕینی قۆناغەكانی خوێندن ڕوو دەكاتە بەغدا، لەبەر نەبوونی داڵدەیەك و بێ دەرامەتی، ژیان ناچاری دەكات (یانەی سەركەوتنی كوردان) بكاتە یەكە داڵدەی خۆی، ئەوەش هەر ئەوكاتە بووە كە (پەیمانگای بەرزی دارستان)ی خوێندووە و ئەڵمانەكان ئەو پەیمانگایە لە كۆلێژی كشتوكاڵ جیا دەكەنەوە، لە لایەك قوتابیانی ناوچە شاخاوییەكانیان وەرگرتووە و لەلایەكی دی لە کۆلێژ و پەیمانگاکانی تر خێراتر دامەزراون و دەستیان لە نانێك گیر بووە، بۆ (كاكەمەم بۆتانی)یش وەك كەسێك كە حەزی لە ئەدەبیات كردووە، بەو هۆیەوە چووەتە ناو سروشت و جوانیی دارستانی خۆڕسك و كێو و دۆڵی كپ و كانی و زێ و ڕووبار و سەدان ئەشكەوتی پڕ نهێنی و مێژووی شارستانیەت پەلكێشی ناو دنیای پرسیاری پڕ گومانیان كردووە، بۆیە شاخ و دۆڵ و گوند و ڕەشماڵی كۆچەریان و كێوێكی كوردستان نەماوە بە فەرمانبەری، یان لە شۆڕشی ئەیلوول بە پێشمەرگایەتی نەیكوتابێتەوە.

 

* سەرچاوەكانی ڕۆشنبیریی و زانیاری

سەرەتای خوێندنەوەكانی كاكەمەم بۆتانی بە ڕۆژنامەی (ژین) و گۆڤارەكانی (هیوا) و (هەتاو) و (شەفەق) دەستی پێكردووە، كە لە كەركووك بووە بە كتێبخانەی (كەركووك)یش ئاشنا بووە، هەروەها ئەو كتێبانەی خاڵی كڕیونی كە كتێبی مێژوویی و سیاسی و كۆمەڵایەتی و فەلسەفی بوون، خوێندنەوەی ئەو سەرچاوانە ئاسۆی بیركردنەوە و زانیاری ئەویان فراوانتر كردووە، لەناو ئەم كتێبانەشدا ڕۆمانەكانی: مەكسیم گۆركی، هەمینگوای، نەجیب مەحفووز و نووسینەكانی چیخەڤ و شەكسپیر و تۆفیق ئەلحەكیم و بردناشۆ و برتۆڵد ڕسڵ و خالید محەمەد خالید هەبوون.

 

* سەرەتاكانی نووسین

سەرەتا بە شیعر دەستی پێكردووە، ئەگەرچی ئەو شیعرانەی لەلای خۆی نەپاراستووە، بەڵام وەڵامدانەوەی مەتەڵەكانی گۆڤاری هەتاو بە شیعر وەك هەوڵی شیعرنووسین لەو گۆڤارەدا ماون، بگرە هەوڵی داوە ئەو زمانە شیعرییە لە چیرۆكەكانیدا نزیك بخاتەوە، ئەوەش بە ڕوونی لە كۆچیرۆكی (بازنە) و ڕۆمانی (درز)یشدا دیارە، بۆیە هەوڵە سەرەتاییەکانی نووسینی كاكەمەم بۆ نیوەی دووەمی ساڵانی پەنجاکانی سەدەی ڕابوردوو، واتە ساڵی ١٩٥٦ دەگەڕێتەوە، كە بە نووسینی سادە و ساكار دەستی پێ كردووە، دوایی بەهۆی دەركردنی ژمارە سەرەتاییەكانی گۆڤاری (ئامانجی قوتابیان) كە بە نهێنی، لقی كەركووكی یەكێتیی قوتابیان دەری كردووە و بە دەست نووسراوەتەوە و پەخش كراوە، ئەو لێرە هاتووەتە پێشەوە و وتاری تێدا نووسیوە، زۆربەی باسەكانی ئەو بڵاوكراوە نهێنییە، پێوەندییان بە زمان و خوێندنی كوردی و وانە وتنەوە بە زمانی كوردییەوە هەبووە، بەڵام یەكەم بەرهەمی سەرنجڕاكێشی ئەدەبی خۆی بەناوی (بەسەرهاتی كنێر) ساڵی ١٩٥٧ لە گۆڤاری (هەتاو)دا بڵاوكردووەتەوە، دواییش چەند نووسینێكی تری بەدوادا هاتووە، هەموو ئەو نووسینانەشی بەناوی خوازراوی (ڕاپەر) و (ڕاپەر بۆتانی) و (خاتوو زین) بوون، ئەم یەكەم چیرۆكەشی وەك (ڕەئووف حەسەن) دەڵێ: سەرەتایەكە بۆ بەكارهێنانی (مۆنۆلۆگی ناوەوە) لە چیرۆكی كوردیدا.

 

* كاكەمەم بۆتانی وەك نووسەرێكی نەتەوەیی و نیشتمانپەروەر

كاكەمەم بۆتانی پێی وابوو كورد سوودی لە هەڵەكانی دوای یەكەمین و دووەمین جەنگی جیهانی وەرنەگرتووە، بۆیە بووینەتە ئاردی ناو دڕكان، ئەو دەیگوت بەرهەمی ئەدەبی و ڕووناكبیریی گەلانی ژێر دەست و بێ قەوارەی سیاسی وەك ئێمەی كورد و بلووج و ئەمازیغی تا ڕزگاری نیشتمانی و بەدی هێنانی یەكێتیی خاك و نەتەوە، پێویستە ببێتە یاریدەدەری خەباتی سیاسی ئاشكرا و نهێنی، بەڵام لە ئەدەبدا نابێ ئەو خەباتە سیاسییە ببێتە دروشمی زەقی دوور لە هونەر و داهێنان، بەڵكوو ئەدەبێك بێت لە هەست و نەست و خولیا و خەون و ئاواتی نەتەوەییەوە نزیك بێت، ئەو کە كەسێكە لەسەر خاكێكی لەتوپەت كراو و داگیركراوی ژێر پۆستاڵی داگیركەراندا ژیاوە، ئەوەی لە مێژووی هەمەجیشدا نەدیتراوە، بەو خاك و نەتەوەیە كراوە، بۆیە (شوێن) لە كارەكانیدا، ئەو خاك و وڵاتەیە و وەك تیمەی سەرەكی و لە بەرگێكی هونەریدا خراوەتە ڕوو، كە ڕووشی لە دنیای چیرۆكنووسیی كردووە، زۆر سوودی لە ڕێنماییەكانی مامۆستایان: د. مارف خەزنەدار و د. جەمال نەبەز وەرگرتووە، چونكە ئەوکاتە ئەوانە لە قوتابخانە ناوەندییەكانی كەركووك بوون و وانەیان پێ گوتووەتەوە، ئەوە لە پاڵ بەهرە و مەیلی خۆیشی بۆ هونەری چیرۆكنووسین، بۆیە كە كەوتووەتە ئەو بوارەوە، هەر پەیڕەی ئەو ڕێچكە و ڕێبازەی كردووە، لەبەر ئەوەیشە بەرهەمەكانی سەرومڕ لە بازنەی كوردایەتیدا دەخولێنەوە، ڕۆمانەكانی زیاتر لەناو ڕووداوەكان، بە تایبەتی ڕووداوە سیاسییەكان كاریان كردووە و ڕسكاون، لەو ڕووداوانەوە سەرچاوەیان گرتووە، شاكەسەكانی ئەو ڕۆمانانە لەناو ئەو ئاسۆ فراوانەدا هەڵسوكەوت دەكەن و دەسووڕێنەوە، بۆیە هەمیشە پێی دەگوتم من قەرزاری سیاسەت نیم، بگرە سیاسەت قەرزاری منە، چونكە نەك هەر ژیانم، بگرە بیر و بەرهەمی ئەدەبییشم لە قەبەڵ كردووە و بەردەوامیش لە قەبەڵی دەكەم.

 

* بانگەوازی ڕوانگە، قەڵەمە نوێخواز و یاخی بووەکانی کۆکردەوە

بارودۆخی ساڵانی شەستی سەدەی ڕابوردوو و ڕەشبگیری و ڕاوەدوونانی نیشتمانپەروەران و دژایەتی كردنی زمان و چاپەمەنی كوردی لەلایەن دەسەڵاتە شۆڤێنییەكانەوە، كارێكی وای كرد کە بە درێژایی ئەو ساڵانە، ئەدەبیات و داهێنان و زمانی كوردی لە قاوغێكی بەرتەسك چەق ببەستێ و ببێتە بیابانێكی وشكەڵاتوو كە بە ڕۆژگارێكی تاریكی ڕۆشنبیریی و ئەدەبیاتی كوردی دەژمێردرێ، ئەوكاتەی کە سستی و خامۆشی باڵی بەسەر ئەدەبیاتدا كێشابوو، كاكەمەم بۆتانی و هاوڕێ داهێنەرەكانی: شێركۆ بێكەس و حسەین عارف و جەلالی میرزا كەریم كە لە بەغدا بوون بیریان لە بزاڤێكی نوێخوازانە كردەوە، كاكەمەم بۆتانی لە ساڵی ١٩٧٠ یەكێك بوو لەو چەند كەسەی بانگەوازی ڕوانگەیان ئیمزا كرد كە ئەو بانگەوازە ئەدەبییە هەناسەدانێكی نوێخوازانەی گرنگ بوو بۆ ئەو سەردەمە، ئەوان شەوانە گفتوگۆیان لە بارەی ئەو بارودۆخە ئەدەبییەی ئەوساكە كردووە، تا شێركۆ بێكەس گەڵاڵەنامەیەكی بە ناوی (بانگەوازی ڕوانگە) نووسیوە و نیشانی هاوڕێكانی داوە، دوای پێداچوونەوە و دەستكاریكردن و پەسندكردنی، بڵاویان كردووەتەوە، بەڵام شێركۆ بێكەس زیاتر مۆركێكی شیعری بە بانگەوازەكە داوە و كەمتر بەلای نوێکردنەوەی چیرۆكدا چووە. ئەو بانگەوازە لە كاریگەری بەیانی شیعری ١٩٦٩ی عێراق و قوتابخانە و تەوژمە ئەدەبییەكانی ئەورووپا و بەرهەمەكانیان، بانگەوازی سریالییەكان و جووڵانەوە ئەدەبییەكانی فەڕەنسا بە دوور نەبوو، ئەوانە تێكڕا كە ئەدەبیاتی عێراقیان هەژاندبوو، كاریگەری لەسەر ئەدەبیاتی كوردییش دانابوو، بە تایبەتیش وەك دەزانین ساڵی ١٩٦٩ نووسەر و ئەدیبە كوردەكان شەوانە لەگەڵ نووسەر و ئەدیبە عەرەبەكان لە یانەی (عەدلیە) دانیشتوون، بەهۆی چالاكی چەند شاعیر و ئەدیبێكی عەرەبەوە كە لە بەغدا بوون، لەوانە (فازڵ عەزاوی) و (موئەیەد ئەلڕاوی) كە هەردووكیان هاوڕێی سەردەمی ژیانی كەركووكی كاكەمەم بۆتانی بوون، ئەوانە پێكەوە گفتوگۆیان لە بارەی بارودۆخی ئەدەبی كردووە، كە پێشتریش ئەو دووانە لە گرووپی كەركووك بوون و بۆ تێپەڕاندنی دۆخی سڕبووی ئەدەبی عێراقی كاریان كردووە. دەركردنی (بانگەوازی ڕوانگە) تەنیا بیروڕا و بۆچوونی ئەو چەند ئەدیب و نووسەرە نەبوو كە ئیمزایان كردبوو، بەڵكوو هەر ئەدیبێك كە دەیخوێندەوە كاری تێ دەكرد، هەموو ئەدیب و قەڵەمە نوێخواز و یاخی بووەکان لەگەڵ بانگەوازەکە بوون، تەنانەت هەندێک لەو قەڵەمانە ڕەخنەیان لەوە دەگرت کە لە بانگەوازەکەدا کەم وتراوە و بە باشی پەیامەکەی نەپێکاوە، ئەوە لە کاتێکدا بانگەوازی ڕوانگە هیچ تخووب و سنوورێکی بۆ نوێکردنەوە نەکێشابوو، هیچ مەرجێکی بۆ تازەکردنەوە دانەنابوو، بۆیە وتراوە ئەو ئەدیبانەی بڕوایان بە نوێخوازی هەیە، با خۆیان بە خاوەنی ئەو بانگەوازە بزانن، لەبەر ئەوەیە دەڵێین بانگەوازەکە موڵکی هەموو نوێخوازێک بووە، بەڵام نەیارەکانی ڕوانگە دەگەڕان لاوازترین بەرهەمی ئەدیبە لاوەکانیان  وەک نموونەی ئەدەبەکە دەهێنایەوە بۆ سەرکوتکردن و لێدانی ڕوانگە، خۆیان لە قەرەی دەقە جوانەکان نەدەدا و خۆیان لێیان نەبان دەکرد، بەڵام ئەو چەند ئەدیب و نووسەرە ویستیان بە بانگەوازێك ئەو بەرهەمانەی خۆیان بخەنەڕوو كە بەهۆی بارودۆخی سیاسی و كۆمەڵایەتی بڵاونەكرابوونەوە، ئارەزووی زۆریان بۆ نوێكردنەوەی ئەدەبیات، لەولاشەوە بەهۆی ژیانی ڕۆژانەیان لە بەغدا كە ئەو چوار كەسەی كۆكردبوویەوە و بەردەوام پێکەوە بوون، ئەو بانگەوازەیان دەركرد، كاكەمەم بۆتانی خۆی دەڵێ: داینەمۆی بانگەوازی ڕوانگە شێركۆ بێكەس و حسەین عارف بوون، كە ئەو بانگەوازە دەنگدانەوەیەكی گەورەی هەبوو.

 

* بەیاننامەی قەڵەمە نەترسەكان

ئەو بەیاننامەیەش لە ساڵی ١٩٧١، دوای بانگەوازی ڕوانگە دەرچوو، كە نزیكەی (٣٠) ئەدیب و نووسەری لاو و دیار ئیمزایان كردبوو کە بۆ پشتیوانی كردن لە مافی ئافرەتان و جاڕدانی یەكسانییان لەگەڵ پیاوان بوو، جاڕدانی بەیاننامەی (ئەی قەڵەمە نەترسەكان یەكبگرن) كە كاكەمەم یەكێك بوو لەوانەی ئیمزایان كردبوو، لەلایەن كۆنەپەرستان و دوژمنانی پێشكەوتنەوە دژایەتی زۆر كرا، تەنانەت كار بەوە گەیشت بەیاننامەیان لەسەر دەربكرێ و داوای كوشتنیان بكەن، بەڵام هەر زوو ڕەوانشاد ئیدریس بارزانی فریاكەوت و داكۆكی لێ كردن و گرفتەكەی بۆ چارەسەر كردن.

 

* كاكەمەم بۆتانی وەك ڕۆژنامەنووس

گۆڤاری شەفەق كە لە شاری كەركووك دەردەچوو، زۆربەی نووسەرانی كوردی دانیشتووی ئەو شارە خۆبەخشانە كاریان تێدا دەكرد، لەوانەش: شەهید مارف بەرزنجی، د. مارف خەزنەدار، عەبدولسەمەد خانەقا، ئیبراهیم ئەحمەد (بلە)، عومەر عارف قابڕەش، (كاكەمەم)یش یەكێك بووە لەوانەی خۆبەخشانە لەو گۆڤارەدا بەردەستییانی كردووە، ماوەیەكیش وەك نوێنەری گۆڤاری (هەتاو)ی هەولێر، لە كەركووكەوە دیسان خۆبەخشانە هەواڵی بۆ كۆكردووەتەوە.

لە (یانەی سەركەوتنی كوردان) لە بەغداش، سەرەتا وەك بەشی كارگێڕی یانەكە بە مانگانەیەكی كەم دامەزراوە، دوایی بەهۆی هاموشۆكردنی نووسەرانی گەورەی كوردەوە، زۆربەیانی ناسیوە، دواتر بە ئەندامی دەستەی نووسەرانی گۆڤاری هیوا دانراوە و تا ساڵی ١٩٦٣ بە هاتنی قەومییە شۆڤێنییەكان، گۆڤارەكە ئەو دەورەی نەما و ئەویش لە كارەكە دووركەوتەوە.

 

* کاکەمەم بۆتانی شانۆنامەشی نووسیوە

ڕەنگە كەم كەس بزانێ كاكەمەم بۆتانی هەوڵی نووسینی دەقی شانۆییشی دابێ، چونکە ئەو زیاتر وەك چیرۆكنووس ناسراوە، دوایی وەك بەشی زۆری چیرۆكنووسانی كورد، ڕووی كردووەتە ڕۆماننووسین و ئەو سۆز و مەیلەی بۆ چیرۆكنووسین، یان نەماوە، یان زۆر لە كزی داوە.

 

* كاكەمەم بۆتانی وەك یەكێك لە دامەزرێنەرانی یەكێتیی نووسەرانی كورد

كاكەمەم بۆتانی لە مانگەكانی كۆتایی ساڵی ١٩٦٩ و سەرەتای ساڵی ١٩٧٠ لەگەڵ هاوەڵەكانی یەكێك بووە لە دەستەی دامەزرێنەرانی یەكێتیی نووسەرانی كورد، كە دواجار لە ١٠/٢/١٩٧٠ بە ڕەسمی مۆڵەتی كاركردنیان وەرگرتووە.

بە حوكمی ئەوەی ماوەی نزیكەی (١٠) ساڵی چڕ و پڕ و بەردەوام لەگەڵ كاكەمەم بۆتانی ڕێكخراوێكی حەساسی وەك یەكێتیی نووسەرانی كوردمان بەڕێوەبرد، ئەوەندەی من لێی تێگەیشتم ئەوە بوو، ئەو حەزی دەكرد ئەو ڕێكخراوە دوور لە دەستتێوەردانی حزبەكان كاری خۆی بكات و دوورونزیك دەست نەخەنە كاروبارەكانییەوە، چونكە جگە لەوەی ڕێكخراوەكە هیچ ئیعتیبار و هەیبەتێكی نامێنێ، ئەوە دەشبێتە شوێنی ململانێی حزبی و ئەركە نەتەوەییە پیرۆزەكەی خۆی لەبیر دەچێتەوە، دەشبێتە بووكەڵە بە دەستیانەوە و چۆنیان بوێ ئاوای هەڵدەسووڕێنن. منیش كە هەر ئەو بیروڕایەم هەبووە و هەیە، بۆیە هەر زوو پێكەوە بڕیارمان دا حزبایەتی نەیەتە ناو ئیشەكانمانەوە و زیاتر كوردایەتی بكەین، پیشەییانە و ئەوەی چاكە و بۆ نووسین و زمان و ئەدەبیاتی كوردی خێر دەداتەوە ئەوە بكەین، یان پیشەییانە داكۆكی لە ئەندامەكانمان بكەین، ئەو ناو بە ناو دەستی بەرز دەکردەوە و پشتی دەستی پێ نیشان دەدام کە چۆن لە ساڵی ١٩٦٤وە داغی کردووە و تۆبەی کردووە کە ئیدی حزبایەتی ناکات، بۆیە هەر زوو پێكهاتین كە هەر كەسێک و سەر بە هەچ لایەنێكی سیاسی و حزبێكە كە هاتە ناو ماڵی یەكێتیی نووسەرانەوە، بەرگی حزبایەتی خۆی تووڕ بداتە ئەولاوە و لەگەڵ خۆی نەیهێنێتە ناو ئیشوكارەكانەوە، تا دوا هەناسەشی بەو شێوەیە پێکەوە كارمان كرد و بە نەفەسێكی پیشەییانە كارەكانمان ڕایی كرد، تا یەكێتیی نووسەران بكرێتە سەنگەری داكۆكی كردن لە نەتەوە و لە ئازادی بیروڕا دەربڕین و لە خزمەتی ئەندامەكانیدا بێ.

كاكەمەم بۆتانی وەك كەسێكی ئاگادار و بەشدار لە مێژووی یەكێتیی نووسەرانی كورد كە لەم دواییەدا تووشی تەنگژەی دارایی و پشتگوێ خستن بووینەوە، دەیگوت: كە لە ساڵی (٢٠١٠)ـەوە تا ماوەی سێ ساڵ و نیو پاڵپشتیان كردین، كار و چالاكییەكانمان بارتەقای (٤٠) ساڵی تەمەنی ڕابوردووی یەكێتیی نووسەران بوو، بەڵام لە ساڵی (٢٠١٤)وە، بە هاتنی داعش كە ڕێكخراوەكە فەرامۆش كراو ئاوڕی لێ نەدرایەوە، تا ئەم ساتە پشتگوێ خراوە و كەس بە پیرییەوە نەهاتووە تا كۆنگرەكەی خۆی ببەستێ.

كاكەمەم بۆتانی کە ئەمڕۆ نووسەرێکی ناسراوی کوردستانە، تا ڕۆژی لە دنیا دەرچوونی نزیكەی (٢٠) كتێب و نامیلکەی چاپكراوی لەپاش بەجێ ماوە، چەندان كتێب و نامیلکەی تریشی وەك دەستنووس بەجێ هێشتووە، ئەو كتێبانەی لە بواری هەمەچەشنی نووسیندا بڵاوكراونەتەوە، لەو تەمەنی (٨٣) ساڵ و (٩) مانگ و (١٥) ڕۆژەدا، نزیکەی (٦٤) ساڵی بەكاروباری نووسین و سیاسەت و كاری ڕێكخراوەییەوە خەریك بووە، هەرچەندە لەو هەموو ساڵانەی تەمەنیدا كە خەریكی نووسین بووە، هەندێ جار ڕێككەوتووە بە پاساوی جیا جیا، لە نووسین دابڕاوە، بەڵام دواتر لە پەنای كۆچیڕۆكێك، ڕۆمانێك، بیرەوەری و یاداشتێكی نووسراوەوە، یان لە كاری ڕێكخراوەیی، لە یەكێتیی نووسەرانی كورددا دەركەوتووەتەوە.

 

 

 

* دواوتە

لەم یادەدا پێشنیار بۆ داوودەزگاكانی چاپ و پەخش و هەموو داوودەزگا كولتوورییەكانمان دەكەم، سەرجەمی كتێبە چاپكراو و چاپ نەكراوەكانی ئەو نووسەرە بە چەند بەرگێك بە چاپ بگەیەنن و بیانخەنەوە بەردەستی خوێنەرانی ئەمڕۆ، بە تایبەتی بایەخ بە دەستنووسە چاپ نەكراوەكانی بدرێ و تا زووە ڕووناكی ببینن.

هەر بۆ شاد بوونی گیانی كاكەمەم بۆتانی، چیتر ڕێكخراوی یەكێتیی نووسەرانی كورد كە هەمیشە و تەریب لەگەڵ بزاڤی نیشتمانی و نەتەوەیی ڕۆیشتووە و چەندان ئەندامی شەهیدی هەیە، بۆ ئەوەی بە یەكڕیزی بمێنێتەوە، بۆ ڕێزنان لە هەوڵ و ماندووبوونی دەیان كەسی وەك كاكەمەم بۆتانی كە كاریان بۆ كردووە و ساڵی ٢٠١٠ سەرپێیان خستووەتەوە، بە هیمەتی هەموو لایەكیش ڕێگە نەدراوە لەسەردەمی ناكۆكییە سیاسییەكان و شەڕی نەگریسی ناوخۆ دوولەت ببێ و هەر بە یەكگرتوویی ماوەتەوە و كەس زاتی نەكردووە دوو لەتی بكا، ئەوە لە كاتێكدا هەموو ڕێكخراوەكانی دی دوو لەت كران، بۆیە دەڵێم: تكایە.. تكایە ئەو ڕێكخراوە لە ئیفلیجی ڕزگار بكەن و هەرچی زووترە بڕیار لە بەستنی گۆنگرە بدرێ تا دەستەیەكی نوێ، بە گوڕوتینێكی نوێوە بێتە مەیدانی كاركردن، ئەو ژێرخان و هەیكەلەی دروست كراوەتەوە، دوای (١٨) ساڵ لە كاركەوتن، جارێكی دی نەیەینەوە سەر خاڵی سەرەتا و ڕەنج بە خەسار نەبین، پێموایە ئەو هەنگاوەش تەنیا هەنگاوێكە گیانی ڕەوانشاد ئاسوودە دەكات.

لە دوماهیدا.. بەو بۆنە غەمناکەوە، بە ناوی خۆم و هاوڕێیانم لە دەستەی باڵای یەکێتییەکەمان (یەکێتیی نووسەرانی کورد) سەرەخۆشی خۆمان بۆ خانەوادە و کەسوکار و خزم و هاوڕێیان و سەرجەم نووسەران و ئەندامانی یەکێتیی نووسەران و ناوەندی ئەدەبی و ڕۆشنبیریی کوردی دەردەبڕین.

 

 

* نووسەری ئەو وتارە لە ساڵی (٢٠١٠)ـەوە جێگری سەرۆکی یەکێتیی نووسەرانی کورد/ مەڵبەندی گشتی بووە و ماوەی (١٠) ساڵ پێکەوە کاریان کردووە.

** ئەم وتارە لە ٢٥/ ١٠/ ٢٠٢١ لە ساڵڕۆژی کۆچی دوایی (کاکەمەم بۆتانی)، لە هۆڵی پێشەوا خوێنراوەتەوە.