لە پێناوی برەودان بە نووسینی دەقی شانۆیی و هاندانی شانۆنامەنووسانی کورد، ناوەندی بڵاوکردنەوەی کەپر بۆ ساڵی ٢٠٢٥ خەڵاتی تایبەتی “دانا ڕەئووف”ی بۆ شانۆنامەی کوردی ڕاگەیاند.

بەپێی ڕاگەیاندراوی ناوەندی کەپر، مۆڵەتی ناردنی شانۆنامەکان لە ١ـی نۆڤەمبەری ٢٠٢٤ دەستپێدەکات و تا ١٥ـی مایسی ٢٠٢٥ بەردەوام دەبێت. نووسەران دەتوانن شانۆنامەکانیان بۆ ئیمێلی info@danamarouf.com بنێرن.

ناوەندی کەپر، کە هەموو ساڵێک لە هەمان کات و ڕۆژدا ئەم خەڵاتە پێشکەش دەکات، چەندین مەرج و ڕێنماییان بۆ بەشداربووان دیاریکردووە:

– خەڵاتەکە بۆ هەموو ئەو نووسەر و شانۆنامەنووسانەیە کە بە زمانی کوردی شانۆنامە دەنووسن، بە بێ ڕەچاوکردنی تەمەن و شوێنی نیشتەجێبوون.

– پێویستە دەقەکان بە فایلی وۆرد و بە فۆنتی یونیکۆرد نووسرابن و لەگەڵ سی ڤیی نووسەر هاوپێچ بکرێن.

– دەقی نێردراو نابێت پێشتر بڵاوکرابێتەوە یان نمایش کرابێت.

– دەقەکە نابێت لە ٣٠ لاپەڕەی (A4) کەمتر بێت.

– گرنگی زۆر بە زمانی کوردی دەدرێت و پێویستە دەقەکان بە زمانێکی پاراو و بە ڕەچاوکردنی خاڵبەندی و ڕێنووسی دروستی کوردی نووسرابن.

لە ڕاگەیاندراوەکەدا هاتووە کە بەڕێوەبەرانی کەپر دەقەکان دەخوێننەوە و لە پاڵ بیروبۆچوونی خۆیان، پرس و ڕاوێژ بە نووسەران و پسپۆڕانی دیکەش دەکەن بۆ هەڵسەنگاندنی دەقەکان.

شانۆنامەی هەڵبژێردراو بە بڕی ٥٠٠ دۆلار خەڵات دەکرێت وەک پشتگیرییەکی دارایی بۆ نووسەر و ماندووبوونەکەی. ناوەندی کەپر لە هەموو ساڵێکدا، لە ڕێوڕەسمێکی تایبەتدا ناوی دەقی براوە ئاشکرا دەکات و هەوڵ دەدات دەقە هەڵبژێردراوەکە وەک کتێب چاپ و بڵاو بکاتەوە.

جێی باسە پەیکەری خەڵاتەکە هەموو ساڵێک لەلایەن هونەرمەند “شوان کەمال”ەوە دروست دەکرێت.